ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានត្រាស់បង្គាប់លើកលែងទោសដល់អតីតអ្នកតំណាងរាស្ត្រគណបក្សសង្គ្រោះជាតិ លោក តុ វ៉ាន់ចាន់ ជាង២០ថ្ងៃក្រោយសុំចូលរួមជីវភាពនយោបាយជាមួយបក្សប្រជាជន។

ព្រះបរមនាថ នរោត្តម សីហមុនី បានលើកលែងទោសឱ្យលោក តុ វ៉ាន់ចាន់ ភេទប្រុស កើតឆ្នាំ១៩៦៩ នូវទោសទាំងអស់ដែលលោកត្រូវបានតុលាការផ្ដន្ទាទោស។

លោក តុ វាន់ចាន់ ត្រូវតុលាការសម្រេចផ្តន្ទាទោសលើសំណុំរឿងចំនួន ៣ករណីដូចជាការផ្ដន្ទាទោសដាក់ពន្ធនាគារ ១០ឆ្នាំ និងពិន័យជាប្រាក់ ២លានរៀល ចុះថ្ងៃទី១៦ ខែវិច្ឆិកា ឆ្នាំ២០២០។ ការផ្ដន្ទាទោសដាក់ពន្ធនាគារ ៨ឆ្នាំ តាមអំណាចសាលក្រមព្រហ្មទណ្ឌស្ថាពរ ថ្ងៃទី១៧ ខែមីនា ឆ្នាំ២០២២ និងការផ្ដន្ទាទោសដាក់ពន្ធនាគារកំណត់ ៥ឆ្នាំ តាមអំណាចសាលក្រមព្រហ្មទណ្ឌចុះថ្ងៃទី១៤ ខែមិថុនា ឆ្នាំ២០២២ របស់សាលាដំបូងរាជធានីភ្នំពញ។

ការលើកលែងទោសនៅពេលនេះគឺបន្ទាប់ពីលោក តុ វ៉ាន់ចាន់ បានសុំចូលរួមជីវភាពនយោបាយជាមួយគណបក្សកាន់អំណាចតាមរយៈលិខិតដែលលោកសរសេរជូនទៅសម្តេចនាយករដ្ឋមន្រ្តី ហ៊ុន សែន ជាប្រធានគណគណបក្ស នៅថ្ងៃទី៥ ខែឧសភា ឆ្នាំ២០២៣៕